《花絮》范鸿龄羡慕现今小朋友多玩具,自叹小时只能「玩手指」

《经济通专讯》香港地嘅小朋友真系一代比一代幸福，唔单食好着好，连玩具都多不胜数，好多小朋友都拥有不止一部游戏机。相比以前嘅小朋友，玩具就真系少好多，最多玩下石头仔，又或者跳下飞机呢类免费娱乐，就连中信泰富（０２６７）董事总经理范鸿龄都感叹，自己细个嗰阵乜都无得玩，惨到要「玩手指」咁话。

范鸿龄今朝出席会展嘅２００７年玩具展开展开幕典礼，系演讲时突然有感而发，佢话而家啲小朋友就系好鬼幸福，玩具种类多到吓死人，有婴儿玩具，又有有糖食有玩具送嘅糖果玩具，谂番起佢细个时，佢只有一件玩具，就系佢嘅手指，有时玩手指玩到闷，仲要玩埋脚指添喎。 虽然范鸿龄怨自己细个无玩具玩，但可能就系因为咁，玩手指玩到数口咁精，可以打理一间咁大规模嘅上市公司。相反而家小朋友即使多玩具，都未必系好事嘅。如果父母想小朋友将来成材，都不妨效法下范鸿龄呢个咁嘅训练方法。（ｃｎ）

作者声明：在本机构、本人所知情的范围内,本机构、本人以及财产上的利害关系人与所述文章内容没有利害关系。本版文章纯属个人观点,仅供参考,文责自负。读者据此入市,风险自担。